محاورة المتــّـه

*
*
رح قرقعلكم محاوره

شبه كاسة مته ..... شبه شعر... شبه زجل!!!!!!! شبه عتابا !!!

!شبه مدري شو؟؟؟

يلا خليها شبه مته
*
*

المته المته عالمته

هو

اعمليلي كاسة مته

والحقيني لبرّه

ولا تنسي الغاز تجيبيه

لنسخن أكتر من مرّه

وخلي ريما ترشرش ميّ

مبارح قتلتنا الغبره

وشوفي خييك عالجوال

بيمضيها قيل وقال

الموالح يستعجلها

هادي ستو منتظره

هي

شو مابقلك عالمته

بتقلي حاجي تلتي

والله كرهت المصاصه

والصينيه والكاسه

والعدة اللي ما بتهدا

والبزر وطراحة ستي

قبل عيونك ما تفتح

عالمته بتصير ترندح

وان العده جيبوها

لحتى فيك تصحصح

ويمكن بره نسيناها

والدنيا بدها تشتي

شوف المجلى عمرانه

بالكاسات المليانه

الرحمه ملاّت من الجلي

بحضي بديني برقبتي

هو

حديّجتنا صارت ملفى

للجلسات الحميمه

جارتنا ام اسماعيل

وخدوج وبنتا سليمه

مرّ فلان وقال فلان

ومرْت فلان وبنت فلان

وفلان اللي مرقت مرتو

وزورتنا زوره لئيمه

فلانه بتحبه لفلان

وفلان بيعشق ع مرتو

وفلانه أخدت ابن فلان

الجدد موبايل بنتو

هادا بعرف النسوان

تسلايه وكاسة مته

وانا برأيي يافلان

هادي هيي النميمه

هي

بشرب المته بسلميه

اسبقنا الارجنتينيه

والنبك ويبرود ومصياف

ومحرده ودير عطيه

وطرطوس وكل ضياعا

لك وكل الديره الغربيه

وحديجتنا ما بترتاح

حتى بعز الشتويه

شي بيقولو للتنحيف

وشي بيقولو للكليه

وكله حكايا وتخريف

بالقيمه الغذائيه

هو

حول عالمته ياجار

لساتا بأول نقعه

عمترغي متل الصابون

شاطر انا بهالصنعه

بلحّق عالكل ومابمل

وعالنسوان المجتمعه

ما بتقطع ابدا بالمره

خدلك شي كاسه مره

حاجه مقضاها تفكير

بالجوال والفواتير

والخضره وهم الولاد

حاجتنا شقا وتعتير

اضربلك شي كاسة مته

هي

المته كلها فوايد

بتشيل الهم الزايد

لولا انك ما تشرشر

ومبقع كل هدومك

ابريق بضهر ابريق

من لمّا بتصحى من نومك

وبتشرب مته عالريق

مفكر بتروح همومك

وعالحمام رايح جايي

وعحالك عم بترتر

المته المته عالمته

يا ويلي اندلق الابريق

عالطراحة يا ستي
*
*
*
سامحونا

وقرقعولنا رد... شبه رد ....شبه مته

وتسلموا لسماركم

ومشتهي اشرب كاسة مته معكن
*
*
سمار
*
*