الحاج كاكور ضل عزابي وما تزوج وتوفى عن عمر اكتر من 80 سنة وما كنت اعرف ليش مع انو كان عندو دكان وكانت هالدكان ساترة تلات ارباع الحارة بكلمتين " لآخر الشهر " من فترة خطرلي خاطر انو بركي هالحاج كاكور كان عندو عمق وقدرة ع التنبؤ وعرف انو رح تصير هالشغلات كلها وخاف من النهاية !
عرف انو رح نصير ما عاد فينا نميز البنت من المخطوبة من المتزوجة !
وانو الحارة الغربية ما رح تتسمى باسم الماغوط او باسم شي شهيد من هدول اللي ضحوا ! ورح تقترح تسميتها باسم بريتني سبيرز او شاكيرا ! وانا بما انو من حارتوا - يعني لازم انتفش ويكبر راسي وانكشلي على صلة قرابة فيه من تحت الارض متل ما عملوا الكل - بعرف انو ستي كان اسما بهية وما بتعرف شي عن شاكيرا وبتعرف الحاج كاكور اكتر شي وبرأيا إنو أهم من كل الزعماء بالنسبة الها لانو ما كان يمنع الخضرة عنها واللبن مهما تأخر آخر الشهر !
وبجوز تخيل إنو رح يصير محل بيت جدي ناطحة عواميد كهربا على شارعين وفيها عشرات الشقق اللي بتشبه مصيدة الفيران ورح يصير في عنا سوبر ماركتات كبيرة بتشتغل 24/ساعة على 24/ساعة وبترجعلك علكة بدال المصاري وما فيها فيران بالمربى اللي بتبيعوا وبتحطلك بالكازوزة - شلمونة- !
وعرف كمان انو عد المصاري رح يصير اسهل بعد ما صارت الألف شقفة وحدة وأي واحد صار يشوف الألف ايمتى ماكان وبأي وقت بالليل أو بالنهار - مع انو اول مرة بشوف الخمسمية كان عمري شي اربطعش سنة !!
يمكن حس انو رح يصير سور من المقاصف حولينا منشان تمتص هجمات البدو بعد ما توفى جدي المير بو ملحم - وعنجد جدي مو عم اتقرب فيه - وهالسور او الحزام الحامي اعظم من سور الصين لانو بيأمن حاجة فكرية لشبابنا منشان يشربوا عرق ويدخنوا لحتى يصيروا متل فايز خضور شعراء كبار لانو هو كان يعمل هيك ولولا هيك ما صار متل ما صار مع انو مرتوا درستني بالمرحلة الابتدائية و ما كانت رضيانة عن الوضع !
عرف انو ما رح يضل فقر والدليل انو المطاعم والكافتيرات مليانة على طول وعم تكتر مع انو فيها الدفع - شندي - مو لآخر الشهر !!
كلو حامل موبايل العايز والمو عايز لانو صار ضرورة تاريخية والواحد لازم يعرف بركي هجمت علينا اسرائيل كيف بدنا نعرف مو معقولة نتراسل بالحمام بالزاجل بعد كل هالتطورات ولازم نشحن ولو بالدين لانو صار سلاح استراتيجي !
أكيد تنبأ إنو العيشة بالشام بدا تصير انو بتفيق الصبح بتفكر حالك طول الليل عم تنفض سداجة بغرفة مسكرة وخشومك بتطلع شحوار بالكيلو وجسمك مبقع من بقات بردى ويلعلع براسك ياس خضر بدال فيروز و تفطر " برياني " بدال الفول المدمس وبدال الياسمين تشم ريحة دواليب السيارات - اذا ضليت تشم طبعا !!!
قولكم الحاج كاكاور كان بيعرف انو بدو يصير هيك لذلك قرر يموت عزابي وينقطع نسلو ولا هيك صدفة طلعت معو او بسبب قصة حب قديمة او شي من هالقبيل !!
ويا هل ترى فينا نصلح ولو شوي فينا نصير نكب المحرمة بسلة الزبالة المخصصة الها !
فينا ما نكسر مقاعد الحديقة ، فينا نعلم ولادنا يقروا كتب ويشمو ريحة الحبر فينا نبطل نرمي على الدولة ونقول كلو منها فينا نستفيد من النت بغير الشات ونقرا شي بيهمنا اكتر فينا لما نشرب عرق ندور على النديم قبل الكأس !!!
فينا نزرع زيتون ، فينا نمشي متل ايام زمان ونقتصر بطلب التكسي وقت حاجتها بس !!!
فينا نصير مسؤولين اكتر ولو بشوي !!!!
